القصة مو قصة علماني وإسلامي ، القصة قصة وسطية وعقلانية و هوية وطنية سورية . متل ما في متطرفين بالدين ، كمان في متطرفين بالعلمانية . يعني ما لازم نقلد أوروبا بكل شي ، و بأوروبا العلمانية عندهم ما يكفيهم من مشاكلهم الاجتماعية والأخلاقية الكبيرة و بيعرفها منيح اللي عايش بيناتهم.
بالنسبة لحريتك الشخصية بخياراتك الجنسية أو الدينية تخصك وحدك ، انت حر تعمل اللي بدك ياه بدائرتك الصغيرة ، بتحب ، بتكره ، بتحبوا الكوسا أو بتفضلوا البانجان ، ما حدا خصه و لا بهمه . بس لا تعمم حياتك الشخصية لمشروع قومي تطبقه على ملايين السوريين اللي عندهم قيم وتقاليد عامة . صلي ، اعبد ، تعلم تجويد ، بس لا تفرض علينا طقوسك و تمسكنا مسبحتك وكأنها المفروض تصير قانون و قبلة للجميع .
نحنا ما بدنا حدا يمنع حدا ولا حدا يفرض شي على حدا . يعني إذا دخلت بيتك وقررت تشلح أو تلبس ،تصلي أو ما تصلي، هاد موضوعك الخاص ، ما بهمنا . الفكرة إنو ما بصير نخلط مفاهيمنا الشخصية بأسلوب حياة المجتمع كله ونحولها لدستور . نحنا عنا هوية سورية إلها طابع خاص ، ما بصير نحاول نمسحها ونحولها لنسخة مقلدة عن أي دولة تانية دينية أو علمانية . التقليد ضعف ، خلينا نعتز بقيمنا و هويتنا السورية بدل ما نحس بعقد نقص .
أما الحكم الإسلامي الوسطي ، فهو مو جلد بالسوط ولا قمع حريات . أغلب السوريين مسلمين ومسيحيين وسطيين وبيعرفوا يعيشوا مع بعض . وإذا صار في دولة اسلامية بقيادة وسطية بتراعي حقوق الإنسان وحرياته ، ما في مشكلة ، فليكن . أنا ما عم طالب بدولة دينية و أنا مع الدولة المدنية من زمان كتير ، و لست شخص متدين بل مؤمن ، بس كمان ما عندي فوبيا من الإسلاميين . المهم تكون دولة ديمقراطية تحترم جميع السوريين بتنوعاتهم و تحفظ حقوقهم الإنسانية الأساسية تحت أي مسمى للدولة علماني أو إسلامي ما مهم .
نطلع من القوقعة تبع علماني و إسلامي ، ونفكر بطريقة أعمق وأشمل . بدنا دولة تجمعنا ما تفرقنا بشعارات فارغة .
دولة دينية متطرفة متل الدولة العلمانية المتطرفة .
