حاسس كأني في ناس بالسوشيال ميديا ناموا و فاقوا فجأة و صاروا حكماء ومعلمين روحانيين و خبراء في كل شيء! قليل لتلاقي بني ادم عادي و ماله استاذ ؟
كتير ناس بيعلموك كيف تتنفس و كيف تشرب ماي و كيف تتعامل مع أبو الغاز و كيف تجذب الطاقة الكونية، وكيف تدخل البعد الخامس و هم في البعد الاول.
كل واحد صار كوتش مدرب ، و اللي مرت بتجربة حب فاشلة صارت كوتش علاقات، و من قرأ كتاب عن الوعي صار مرشد روحاني يبيعك دورة بعنوان: كيف تصبح نسخة مطورة من نفسك في ٣ أيام فقط.
وكل شغلة صار إلها كورس، من كيف تبتسم صح إلى كيف تصير مليونير و كيف تصبحين سكسي و سر الكاريزما ، و يقول لك معي شهادة من معهد شين شان شون للطاقة الكونية!طيب و شو يعني ؟ هل نزل عليك الوحي بالشهادة ؟ و لا حدا طبع لك ورقة وكتب عليها الكوتش الشنشوني !
وناس بهي الطوشة مصدقين و ناس خربت حياتها و بيوتها و نساء تطلقت من ازواجها لاني اكتشفت بعد سنوات طويلة أن زوجها نرجسي من أحد الفيديوهات .
واللي ضايع وراكض من فيديو لفيديو عاليوتيوب ،يبحث عن السر العظيم اللي بده يحرره من همومه و هو يغرق أكثر من دوامة لدوامة من الوهم المغلف بكلمات براقة.
تسعين بالمية يبيعوا الوهم و همهم الظهور و الشهرة او المصاري، عارضين عقدهم النفسية في علب أنيقة، ويضعون عليها ملصقات : تنمية ذاتية و مدربة الحياة و شيخ الدين و المعلم و الفيلسوف و المثقف والخبيرة ......
لا تلحق حدا و تصير تابع و تسلم حالك و عقلك ولا تصدق أي حدا ،عيش بطريقتك أنت أدرى بحالك و جرب لحالك و حتى لو غلطت عادي كتير، اغلط و اتعلم .
و إذا شغلة أو طريقة زبطت مع غيرك مو شرط تزبط معك، يمكن حتى خربتله حياته وهو لسا مفكرها رحلة وعي و حكمة و طريق الايمان و الجنة.لكل واحد طريقه الخاص في التعلم و في الإيمان.
ضروري نتعلم و نتنور من بعض بس الاهم ننتقي و نفلتر ما نشاهد و نسمع و نقرأ ، إشعل النور بطريقتك الخاصة فهو أفضل من الف ضوء مستعار ليس لك
